VIGAN CITY – Agtultuloy ken target a maileppas inton Biernes ti panagiwarasan iti farm inputs kadagiti mannalon iti ili ti Magsingal kas pinasingkedan ni Executive Secretary to the Mayor’s Office Alrico Favis.
Iti pannaki-uman ti Bombo Radyo Vigan ken ni Favis, karaman kadagiti naipaay ti nasurok 3,300 a sprayer, nakurang a sangaribo a hose, bin-i ken addanto pay manamnama a ganagan a sumangpet nga amin a mannalon ket mabenepisyaran met laeng.
Naiskedyul ti kada barangay nga apan mangala kadagiti kukuada iti munisipyo tapno saan nga agdudupudop dagiti tattao ken adda stub nga ipakitada tapno maala dagiti alikamen a pangtalon.
Nupay kasta, limapulo a milion a pisos ti nailatang para kadagiti farm inputs nga agpaay kadagiti mannalon ken balakad ti opisial nga usarenda dagiti naiwaras kadakuada ket saanda nga ilako.
