Awan pay ti plano ti gobierno nga iparit ti Facebook iti agdama, ngem posible a mapaingetan dagiti dadduma a social media platform a saan a sumursurot kadagiti kiddaw dagiti otoridad.
Segun ken ni Palace Press Officer Claire Castro, makitintinnulong ti Facebook iti gobierno iti panangikkat kadagiti post nga adda kinaranggas ken saan a husto nga impormasionna.
Agtultuloy nga ad-adalen ti Malakanyang dagiti regulasion tapno masalwadan ti publiko, nangruna dagiti ubbing, kontra iti napeggad a content iti social media ken gaming platform.
Kabayatanna, makipatpatang ti Department of Information and Communications Technology Secretary Henry Aguda iti Facebook idiay Singapore tapno mapaalisto ti panangsungbatda kadagiti kiddaw ti gobierno.
Gagem ti gobierno a mangipatungpal iti nalawlawag a rules a mangsakup iti amin a social media platforms.
