Nairusat ti ‘EYE-Ayatenka’ Project idiay Ilocos Sur National High School a ti gagemna ket ti nasapsapa a pannaka-diagnose iti parikut ti mata dagiti estudiante.
Ti proyekto ket indaulwan ti ISNHS Parent Teachers Association, kabinnuligda dagiti nadumaduma nga ahensia kas ti Rotary Club of Makati, Rotary Club of Vigan, Philippine Nurses Association, Ilocos Sur Medical Society ken Philippine Red Cross.
Iti pannaki-uman ti Bombo Radyo Vigan ken ni Provincial Health Officer Michael Rabino, 250 nga estudiante manipud iti Grade 8-12 iti nasao a pagadalan ti recipient iti proyekto.
Impaganetgetna ti kinapateg ti proyekto tapno malapdan ti posible nga ikakaro ti parikut iti mata dagiti estudiante, ta mabalin a kaaduan kadakuada ket saan a nakapuy no di ket nakapsot laeng ti panagkitada.
Naisayangkat dagiti lecture mainaig iti kinapateg ti panagkita, eye checkup ken pannakaiwaras dagiti reading glass.
Dagiti estudiante a matakuatan nga adda parikutda iti mata ket maipakaammonto iti principal tapno maplano ti pannakatamingna.
Namnamaen ni Rabino nga iti sumarsaruno a pannakaisayangkat ti aktibidad ket ad-adunto pay met dagiti maserbian.
