Pormal nga inawat ni Pres. Ferdinand Marcos Jr. ti panagikkat iti puesto da Executive Secretary Lucas Bersamin ken Budget Secretary Amenah Pangandaman.
Segun ken ni Presidential Communications Office Undersecretary ken Palace Press Officer Claire Castro, agpada a nadayaw a nagipasa iti resignation dagiti opisyal kalpasan a naibaga dagiti departamentoda iti mapapati a pannakairaman iti flood control anomaly nga agdama a nainget a maimimbestigaran ken panangbigbig ti responsibilidad tapno palubosan ti administrasyon a tignayan a nasayaat iti nasao a banag.
Indanon ti presidente iti panangipategna ken ni Executive Secretary Bersamin para iti steady leadership-na iti Office of the Executive Secretary.
Nagyaman pay ti Malakanyang ken ni Sec. Pangandaman ta iti panagtrabahona iti DBM ket nangpapigsa ti fiscal management iti gobierno, panangtarabayna iti pannakapasa ti national budgets, ken panangsiguradona a ti social programs ken frontline services ket napondoan ken nasayaat a naidanon.
Tapno masigurado ti agtultuloy a governance agenda iti administrasyon ket dinutokan ni Marcos ni Department of Finance Secretary Ralph Recto a baro nga Executive Secretary.
Dinutokan pay ti presidente ni Special Assistant to the President for Investment and Economic Affairs Secretary Frederick Go a baro a Secretary of Finance.
Kabayatanna, ti Department of Budget and Management ket idauluan met ni Undersecretary Rolando Toledo a nadutokan nga officer in charge.
