VIGAN CITY – Inbilin ti provincial government ti Ilocos Sur iti nainget a quarantine procedure ken dadduma pay a disease prevention and control measures tapnu masalakniban iti probinsiya kontra ti novel coronavirus ken dadduma pay a kapada na a sakit.
Mainaig dayta, nangiparuwar ni Governor Ryan Singson ti Executive Order Number 3 a nangibilinan na iti pannakaipatungpal kadagiti wagas tapnu malapdan iti pannakastrek iti nasao a virus ditoy probinsiya.
Dayta ket kalpasan nga adda ti maysa a kumpirmado a kaso ti NCov ditoy pagilian.
Ti nasao nga executive order, inbilin ti gobernador iti pannakaisayangkat iti nainget nga inspeksyon kadagiti sumanglad a foreign vessels; panangkumpleto kadagiti impormasyon a kasapulan a nakailanad iti passenger declaration ken health declaration dagiti sumangpet ditoy probinsiya babaen kadagiti domestic flights ken uray dagiti aglugan ti domestic wennu international vessels; barangay monitoring ken tourism establishment monitoring.
Inallukoy na pay dagiti local chife executive kadagiti naduma-duma a munisipyo ken syudad nga usaren ken alertoen da dagiti barangay officials ken dagiti barangay volunteer workers kas kadagiti barangay health workers, barangay nutrition scholars ken barangay service point officers tapnu mamonitor ken irekord da dagiti kailyan da nga agawid ken dagiti agtransient a naggapu kadagiti pagilian nga apektado ti NCov a pakakitaan da kadagiti sintomas kas ti gurigor, uyek ken panateng ket ireport da ti City wennu Municipal Health Office.
