VIGAN CITY – Agpaot agingga inton April 14 iti community quarantine nga inyetnag ni Governor Ryan Singson ditoy probinsiya ti Ilocos Sur gapu ti coronavirus disease 2019.
Babaen iti executive order number 14 series of 2020 nga inparuwar ti gobernador, malimitaran iti biyahe dagiti tattao ditoy uneg iti probinsiya.
Dagiti agtrabtrabaho ditoy probinsiya nga aggapu iti sabali a probinsiya ket mapalubusan da a sumrek nu la ketdi naggapu da kadagiti lugar a saan nga apektado ti COVID- 19 ken dumalan da iti nainget a screenig protocols nu sumrek ken rumuwar da.
Ti travel restriction ket saan na a sakupen dagiti health care workers, responders, PNP members, AFP ken dadduma pay a government personnel a ti trabaho da ket adda ditoy Ilocos Sur.
Adda dagiti checkpoint kadagiti amin nga entry points ditoy probinsiya nga idaulwan dagiti PNP personnel ken daduma pay a uniformed personnel.
Mapalubusan dagiti PUV, jeep ken buses a sumrek ditoy probinsiya ngem kadagiti PUV a kas maibasar iti bilin ti Department of Transportation- Task Group for the Management of Emerging Infectious Disease, ket innem laeng iti mabalin a karga da a pakairamanan ti driver. Nu met jeep ken bus, masapul a saan a nasur-surok ngem iti kagudwa iti regular capacity, pakairamanan ti driver ken konduktor iti karga ti lugan da ken nainget a masurot ti one seat policy.
Dagiti tattao nga agawid ditoy pagilian a naggapu wennu limmabas kadagiti pagilian nga apektado ti COVID- 19 ken dagiti naggapu idiay National Capital Region ket masapul nga aghome- quarantine da.
Saan a maiparit iti pannakaibiyahe dagiti taraon ken kangrunaan a kasapulan ngem dagiti personnel dagiti delivery trucks ket dumalan da ti nainget a screening protocols kadagiti malabsan da a checkpoint. Amin a driver, konduktor, sales agent ken helpers ket masapul a mangipakita ti company driver’s ID, latest health certificate manipud iti lugar a naggapuan da ken dadduma pay a dokumento a masapul dagiti quarantine officers.
Dagiti pagpasyaran ditoy probinsiya ket maisarra pay laeng iti publiko ken amin a business establishment ket adda ti hygiene station da.
Nabilin pay nga ipatungpal dagiti local chief executives ti dua a syudad ken dagiti ili ditoy Ilocos Sur iti curfew hours manipud alas otso iti rabii agingga alas kwatro ti parbangon.
