Executive order a mangipatungpal iti farmgate price ti baboy, nairuar iti ili ti Sto. Domingo

VIGAN CITY – Nangiparuar ti ili a Sto. Domingo iti Executive Order a mangipatpatungpal iti mandated a floor price para iti farmgate price ti baboy ken price ceiling ti lean meat.

Dua gasut a pisos ti kada kilo ti naipatungpal a floor price para ti farmgate price ti baboy idinto a tallo gasut a pisos kada kilo ti ceiling price ti lean pork.

Dagiti saan a makasurot ket sumango iti pannusa iti salinong ti Republic Act No 7581 kas naamyendaran babaen ti Republic Act No 10623.

Maipatungpal ti nasao nga executive order iti uneg ti innem a pulo nga aldaw manipud February 6 ken nakapende no iyatiddug pay ti Provincial Price Coordinating Council.