VIGAN CITY – Inruar ni Ilocos Sur Governor Jerry Singson iti Executive Order No. 30 Series of 2022 a mangbilin iti amin a Local Government Units iti probinsia nga agsagana iti pagannurotan ken response protocols gapu iti manamnama nga epekto ti super typhoon Karding.
Maibasar iti executive order, imbayog iti Philippine Atmospheric Geopphysical and Astronomical Services Administration iti Tropical Cyclone Wind Signal No. 1 iti probinsia a pangitundaan iti kalalaingan agingga nakaru nga epekto ti komunidad.
Segun ken ni Gov. Singson, rumbeng laeng nga agtaripnong dagiti Local DRRMC ken mangisayangkat ti Pre-disaster Risk Assessment para iti layos, ginggined ken panagreggaay iti daga, debris flow, napigsa nga angin ken dadduma pay a hydro meteorological hazards a mayannatup iti panagsagana ken response actions a maisayangkat.
Agbalin a naalibtak a mangkita iti lugar nga adda senyales iti panagreggay, mangisayangkat ti pre-emptive evacuation kangrunaan iti low-lying areas, liklikan dagiti lugar a naapektaran iti namin-ano a darasen a nalayos ken nag-landslide, aglawlaw iti karayan nga adda iti asideg iti bantay, kabaybayan nga apektado iti storm surge, flash floos areas ken dadduma pay.
Rumbeng pay nga agbalin a naalibtak iti panagmonitor iti quarry ken mining areas ken monitoren iti seaboard ken siguradoen a ti sea travel ken small-scale fishing activities ket makita latta.
Nayunay-unay nga amin a departamento a mainaig iti probisyon iti critical emergency services ken disaster risk reduction and management kangrunaanen ti Provincial Disaster Risk Reduction and Management Office, local disaster risk and reduction and management offices, miembro dagiti opisina iti Provincial Disaster Risk and Reduction Management Council ken amin nga ospital ken health services ket agbalin nga alerto iti panagresponse iti amin a concerns ken emergencies.
Naallukoy met iti publiko a maaddaan ti precautionary measure, obserbaren ti minimum public health standards, sumurot kadagiti pakaammo ken makikammayet kadagiti masakupan a local authorities nu bilang adda panagbakwit.
