Binalakadan ni dati a Surigao del Norte Rep. Robert Ace Barbers ti Philippine Coast Guard (PCG) ken Philippine Navy a saan nga agsardeng iti panangbantay iti Bajo de Masinloc tapno saan a tagikuaen iti China.
Binagaan ni Barbers ti PCG ken Navy a saan nga agtalek iti China tapno saan a maipada ti Mischief Reef iti Bajo de Masinloc nga inagaw iti nasao a pagilian idi 1995 gapu iti napalaus a talek iti pagilian kadagitoy.
Segun kenkuana, pinaruar ti China a kayatda laeng nga aramaten ti Mischief Reef a paglinungan dagiti mangngalapda no madi iti paniempo ket gapu iti talek kadakuada ti Pilipinas ket pinalubosanda.
Kinunana a ti reef ket maysan a fortified nga addaan ti naval ports, radar systems, military hangars ken runways ken agserserbin kas advanced monitoring ken operational military hub para iti China.
Pinasingkedanna a padpadasenda manen nga aramiden ti nasao a taktika iti Panganiban Reef wenno Bajo de Masinloc a nasikat pay nga Scarborough Shoal isu a saan a rumbeng nga agsardeng ti PCG ken Navy ta amangan no tagikua-en ti China.
