Inaminen ni dati a Police Col. Edilberto Leonardo ti reward system idi napalabas nga administrasyon nga immunan a kinumpirmaran ni retired Police Lt. Col. Royina Garma.
Iti naisayangkat a maika-siam a panagdengngeg ti quad committee iti House of Representatives a nangrugi idi kalman ken nagpaut itay parbangon, sinaludsod ni Manila Rep. Bienvenido Abante Jr. ni Leonardo babaen ti panagsungbatna iti wen wenno saan.
Sinaludsud ni Abante a chairperson iti House committee on human rights ni Leonardo nu patienna iti dua nga affidavit nga inruar ni Garma inaig ti reward system ken ti kaadda ti Davao Death Squad ket kinunana a wen.
Insaludsud pay ni Abante nu patienna nga adda reward system ket simmungbat iti wen.
Maipalagip nga idi October 11 ket imbutaktak ni Garma iti quad committee a kinontak isuna ni dati a President Rodrigo Duterte idi May 2016 inaig iti pannakaaramid iti maysa a task force a mangiyetnag ti drug war iti national scale babaen ti Davao template, dayta ket maipanggep ti reward system a pakaipaayan ti P20,000 agingga P1 million kadagiti polis a makapatay ti drug suspek.
Nupay kasta inlawlawag manen itattay ni Garma iti kaadda ti reward system idi napalabas nga administrasyon idi sinaludsod kenkuana ni Chairperson Rep. Robert Ace Barbers maipanggep nu kasano iti pannakaalada iti gungguna.
Segun ken ni Garma, maalada laeng iti P20,000 nu napapatay ti drug suspek ket nu saan a napapatay ket awan iti maalada a gungguna.
