Nairuar ti tsunami evacuation guide route iti ili ti Sta. Catalina tapno ammo dagiti umili iti turongenda nga evacuation site nu kas bilang a mapasamak iti tsunami iti kabaybayan.
Iti pannaki-uman ti Bombo Radyo Vigan ken ni Janette Rabara manipod iti Municipal Disaster Risk Reduction and Management Office – Sta. Catalina, iti baet nga imbaban ti PHIVOLCS ti tsunami alert ket agtultuloy latta iti preparedness measure nga ar-aramiden iti ili gapu iti agtultuloy a ginggined a mapapasamak iti agduduma a lugar iti kaasideg iti probinsia.
Segun ken ni Rabara, bassit laeng iti ili ti Sta. Catalina a buklen iti siam a barangay isu a nu mapasamak iti magnitude 8 a ginggined a mabalin a mang-trigger iti tsunami ket posible a maapektaran amin a barangay isu a naituding iti evacuation site ti kabangibay nga ili.
Dagiti naituding nga evacuation site ket iti Bantay Arcade, Quirino Stadium ken Farmers Livelihood Development Center.
Impaganetgetna iti kanayon a panagsagsagana nangruna kadagiti uppat a coastal barangay a sakupen ti Barangay Cabittaogan, Suvec, Paratong ken Tammorong, ngem ti kangrunaan a rumbeng a sisasagana ket dagiti agnaed idiay Sitio Mindanao idiay Barangay Paratong ken Sitio Namnama idiay Barangay Tammorong.
Maibasar iti GeoAnalyticsPH ket posible a 10,500 a populasyon iti maapektaran nu kas bilang mapasamak iti tsunami isu a maipaganetget kadagiti umili iti panagsurotda kadagiti bilin ta saan a nadaras iti agi-evacuate gapu iti manmano a transport vehicle a maaramat.
VIDEO – JANETTE RABARA
Kabayatanna, numan pay kaaddoan a residente iti ili ti Sta. Catalina ket ammodan ti maaramid ket adda manamnama a maisayangkat nga earthquake ken tsunami drill para iti nayon pay nga ammoda.
VIDEO – JANETTE RABARA
