VIGAN CITY– Maisaruno ti pannaka-aprubar iti same sex marriage, abortion ken euthanasia nu maaprubaran iti divorce bill ditoy pagilian.
Dayta ti pagamkan ni Buhay Partylist Rep. Lito Atienza isu’t gapu na a nainget iti panangkontra na ti gakat nga inpila ni House Speaker Pantaleon Alvarez.
Kinuna ni Atienza, nakailanad iti pamunganayan linteg iti pagilian a kasapulan a masalakniban iti sakramento ti kasar ket saan a mabalin a rakraken babaen iti diborsyo agsipud ta ti kangrunaan a maapektaran ket dagiti annak dagiti agassawa nga agsina gapu laeng iti parikot a saan dan a kayat a solbaren.
Patien iti kongresista a babaen iti diborsyo ket umadu dagiti agassawa nga agsisina ken nalaka laengen iti panagsina kadagiti agassawa a saan a naragsak iti sidong iti tunggal maysa.
