VIGAN CITY- Matrataren idiay Kamara ti isyu inaig iti mapapati a panangkabil tida Iloilo Representative Richard Garin Jr., ken ti ama na a ni Guimbal, Mayor Oscar Garin iti maysa a pulis idi napalabas a bulan.
Ti exclusive interview ti Bombo Radyo Vigan, naibaga ni Pangasinan Rep. Leopoldo Bataoil a naidatagen idiay House Ethics committee ti privilege speech na iti plenary session idi January 14 nga inatendaran dagiti ginasuta a pulis kas panangipakita iti suporta da ken ni PO3 Ferdinand Macaya.
Ti panagsarita ni Bataoil, inpatangken na kadagiti kakadua na nga agpanpanday- linteg nga amin a tattao ket agpapada iti imatang ti linteg isu a rumbeng laeng nga awan iti agari-ari ken agpanglaing a manglais iti sabali.
Kas dati a miyembro ti Philippine National Police ket inbaga ni Bataoil a nasakit ti nakem na iti napasamak ken ni Macaya gapu ta awan iti siasinuman nga adda karbengan na a mangidadanes iti pada na a tao, nangruna ket maysa kadagiti kameng ti linteg a nakasagana a mangibuwis ti biyag na para iti sinapataan na nga obligasyon.
