VIGAN CITY – Ad-adu nga estudyante nga Indigenous People wenno IP’s iti naallukoy nga ag-apply iti idiaya nga scholarship iti Ilocos Sur para kadagiti agkolehio iti sumaruno nga school year tapno matulongan iti panagbasada.
Iti pannaki-uman iti Bombo Radyo Vigan ken ni Atty. Ronnie Rapanut iti Committee on Education iti probinsia, adu iti ikonsiderarda para kadagiti kameng ti IP’s kangrunaan iti narigat a panangturongda iti pagadalan a gappuanan iti pannakaapektar ti panagbasada kangrunaanen iti gradoda isu nga adu iti saan a makastrek iti scholarship uray kalikagumda a mairaman.
Segun ken ni Atty. Rapanut, manipod iti walopulo ket lima a porsiento a General Weighted Average (GWA) idi high school-da ket agbalin laengen a walopulo ket tallo a porsiento tapno sigurado a makaabotda iti kwalipikasyon.
Inyunay-unayna a kurang iti pannakaiwaras iti pakaammo kadakuda inaig iti programa a scholarship iti probinsia isu a naallukoy dagiti opisyal kadagiti barangay nga adda IP’s na nga agpakaammo ta napintas iti nagresultaanna ta immadu iti nag-apply manipod iti umuna a distrito.
