Kayat a maimbestigaran ni Senador Risa Hontiveros ti posible a a pannakapapanaw wenno pannakaikkat dagiti komunidad idiay Tarlac nangruna iti lugar a pakaipatakderan ti Pax Silica Industrial Hub.
Nagballaag ni Hontiveros iti posible a relokasion dagiti Aeta ken farming communities iti 4,000 nga ektarya a daga a pakaipatakderan ti Pax Silica site, ta adun dagiti advocacy group ti agbalballaag iti pannakapukaw ti pagsapulan ken pagtaenganda iti uneg ken ruar ti project area.
Iti salinong ti Senate Resolution 563 nga impila ni Hontiveros, nadakamat ti pagkasapulan a ma-assess ti komunidad kasta payen ti regional ken economic impact ti Pax Silica Initiative ken amin nga affiliated project.
Kayatna pay a maammuan no ti nasao nga inisyatiba ket pammaneknek nga agbunga iti positibo nga epekto iti pang-ekonomia nga interes dagiti Pilipino iti agpada a macro ken grassroots level.
