Posible nga inton April 12 wenno April 13 ti kasapaan a petsa ti mabalin a mangiruar ni Presidente Ferdinand Marcos Jr. ti executive order tapno ikkaten wenno kissayan ti excise tax iti produkto-petrolyo, segun iti Department of Finance.
Pinermaan ti Presidente ti Republic Act No. 12316 idi Mierkoles, Marso 25 a mangted kenkuana iti emergency powers tapno ikkaten wenno kissayan ti excise tax iti langis.
Iti panagdengngeg ti Senate Proactive Response and Oversight for Timely and Effective Crisis Strategy Committee, kinuna ni Finance Usec Karlo Fermin Adriano nga agbalin nga epektibo ti nasao a linteg sangapulo ket lima nga aldaw kalpasan a maipablaak iti Official Gazette wenno iti maysa nga statement nga adda general circulation.
Agtataripnong ti technical board ita nga aldaw, idinto a naituding nga agtaripnong ti Development Budget Coordination Committee iti sumaruno a lawas tapno mangbukel iti singasingna para iti Presidente.
