Nakaipasan ti Narvacan National Central High School, mangibagi ti Schools Division of Ilocos Sur ti entry para ti maisayangkat a National Parol Making Contest 2024.
Iti pannaki-uman ti Bombo Radyo Vigan ken ni Katrina Comilang a coach dagiti uppat nga estudyante manipod Narvacan National Central High School a simmali iti nasao a contest, naipatuloden idiay Malakanyang ti parol para iti panagpili ti mangabak.
Segun ken ni Comilang, ti national parol making contest nga inorganisa iti Department of Education (DepEd) ket nakipasetan dagiti high school students iti agduduma a paset iti pagilian babaen ti tema a “Harmonies of Hope: Illuminating Filipino Resilience”.
Kararagda iti pannangabak da Yeina Angel Cabunoc, Ritchie Marie Talingting, Jewel Gasmen, ken Xandra Bernardine Alimpia ta umabot ti maysa a million a pisos ti abaken ti ag-first place ken adda pay gadgets a maited a posible a makatulong iti panagadalda.
VIDEO – COACH KATRINA COMILANG
Inlawlawag met ti maysa kadagiti estudyante a ni Xandra Alimpia a nadumaduma iti materyales nga inaramatda para iti parol ta pinagtitiponda ti ideyada nga agkakadua tapno mapagbalin ti inaramidda.
VIDEO – XANDRA ALIMPIA
Allukoyen ni coach Jeradeth Posedio iti pannakitinnulong dagiti umili babaen iti panagreact iti post a na-upload ti official page iti gobierno para iti pannakaur-or ti puntos ti nasao a parol ta agingga November 15, 2024 ti facebook polling cut off.
VIDEO – COACH JERADETH POSEDIO
Kabayatanna, ti Top 3 winners ket maimbitaran iti Christmas Tree Lighting Ceremony idiay Malakanyang inton December 1, 2024.
