VIGAN CITY – Immadu iti nag-enroll iti Ilocos Sur Community College para iti School Year 2022-2023.
Iti pannaki-uman ti Bombo Radyo Vigan ken ni Dr. Arnel Doctolero nga Administrator iti ISCC, iti innem a kurso nga idiay-diaya ti ISCC nga isu iti Hospitality Management, Tourism Management, Agri-Business, Midwifery, Information Technology ken Cooperative Managemnt ket kangatoan iti enrollees iti Midwifery ta nagtriple iti bilangda.
Segun ken ni Dr. Doctolero, uray kayatda a ma-screen amin nga estudyante kangrunaan dagiti mangala ti Agri-Business ken Midwifery ket adda board exam-na ngem bilin ni Governor Jerry Singson a ma-accommodate amin nga estudyante tapno makaadalda.
Nupay agkurkurang dagiti mangisursuro iti ISCC ket insigida a nagtignay ni Gov. Singson tapno masupusopan ti pagkurangan a mangisursuro.
Aminado ni Dr. Doctolero nga agkurkurangda pay iti classroom ken armchair iti nasao a pagadalan ngem impasigurado iti provincial government a suportaranda babaen ti panangipaay iti uppat a gasut nga armchair.
Manipod pay iti targetda nga uppat a pulo agingga uppat a pulo ket lima nga estudyante kada classroom ket nagbalinen a limapulo agingga innem a pulo ket lima nga estudyante kada classroom.
Naaddaan iti curriculum review iti ISCC kaduada ti Commission on Higher Education Regional Office iti napalabas a tallo a lawas ket nagpapatanganda a maimplementar iti new curriculum kadagiti ag-first year student a ti maysa a highlights ket ti Ilokano Studies tapno ma-preserve ken mapakaammoan dagiti estudyante inaig iti kultura, historia, industria, ken kabibiag ti agnanaed iti Ilocos Sur a pakaawagan kadakuada kas Ambassador iti Ilocos Sur apaman a makaturpos-da iti panagadal.
