Employer a saan a sumurot iti naituding a P50 wage hike, maipasango iti nadagsen a pannusa

Maipasango iti nadagdagsen a pannusa dagiti employer a saan a sumurot iti naituding a P50 a nayon nga inaldaw a sueldo dagiti minimum wage worker idiay Metro Manila.

Ti pannusa ket sagudayen ti gakat nga impila ni Senate President Pro-tempore Jinggoy Estrada a ti gagemna ket masigurado a makaawat iti disente a sueldo dagiti mangmangged ken ipasigurado nga amin nga employer ket ipatungpalda ti nayon a sueldo.

No agbalinton a linteg ti gakat, P25,000 ti muelta ken pannakaibalud iti maysa agingga dua a tawen ti mabalin a sangwen ti employer a saan a sumurot iti nayon a minimum wage.

Impaganetget ni Estrada ti kinapateg a maipatungpal a nasayaat ti linteg tapno sumurot dagiti amin nga employer.