VIGAN CITY – Natay ni Rupert Amano, agtawen tallo pulo ket maysa, addaan live-in-partner, maysa nga empleyado ti Nueva Segovia Consortium of Cooperatives (NSCC) nga agnaed idiay Barangay Don Lorenzo Querubin, Caoayan ta pinaltugan na ti ulo na idi kalman, January 5.
Segun kenni P/Lt. Danilo Fernandez Quiocho, Deputy Chief of Police ti Caoayan Municipal Police Station, ti adu nga utang ti biktima iti mapapati a rason nu apay a nagpakamatay.
Sakbay iti panagpakamatay na, nakasarsarita na pay laeng ti stepmother na ngem sumagmamano a minutos laeng iti napalabas, nakangngeg laengen dagiti kakabagyan na iti putok iti paltog ket idi mapan da kitaen, nakaiddan ti biktima nga adda tama iti paltog iti akin-kannawan a pispisna ket iggem na pay ti caliber 22 magnum revolver a paltog.
Naitaray idiay Ilocos Sur Provincial Hospital – Gabriela Silang ti biktima ngem naideklarar a dead on arrival.
