Impabasol ni House Assistant Majority Leader Jay Khonghun ken ni Bise Presidente Sara Duterte iti mabalin a pannakapukaw ti trabaho iti agarup 200 nga empleado iti Office of the Vice President (OVP).
Segun ken ni Khonghun a ti panagkedked ni Duterte a mangidepensa iti insingasing ti opisinana a P2-bilion a badyet iti House of Representatives ti nangitunda iti pannakakissay ti budget a mabalin a pakaikkatanda ti trabaho.
Inyunay-unayna a no inkalintegan ti bise presidente ti budget ti opisinana, maawat koma ti OVP ti kasapulan a pondo ken mapagtalinaed dagiti empleyado iti trabahoda.
Nupay kasta, saan nga umanamong ni La Union 1st district Rep. Paolo Ortega, maysa a deputy majority leader, iti panangusar iti potential job losses kas justification iti pannakaisubli ti pondo ti OVP.
Kabayatanna, inlawlawag met ni House Committee on Appropriations Senior Vice Chairman Stella Quimbo nga awan ti mapukawan ti trabaho iti OVP, gapu ta kasapulan latta ti nailatang a pondo ti isu met laeng a bilang dagiti empleado.
