VIGAN CITY – Inruar ti Ilocos Sur Provincial Government iti Executive Order No. 24 a pinirmaan ni Gov. Ryan Luis Singson a mangimplementar iti emergency shielding kadagiti agindeg iti Ilocos Sur kas tignay tapno maliklikan iti panagwaras iti covid-19 iti probinsia.
Nakaipalaon iti executive order a salakniban dagiti agindeg babaen iti panangisina manipod general population dagiti addaan iti covid-19, panangpainget iti sumagmamano nga aktibidad ken panang-minimize iti face to face contacts.
Saan a mapalubosan nga agbiahe nga agturong ditoy probinsia dagiti amin nga aggapu idiay Bulacan, Cavite, Laguna ken Rizal pakairamananen ti National Capital Region ken aminen a high risk areas kalaksidan laeng no essential travelers.
No man bilang mapalubosan a sumrek iti probinsia ket rumbeng laeng nga insigida nga agreport iti Rural Health Unit a papanan.
Dagiti mapalubosan a sumrek ken rumuar iti probinsia ket iti essential ken emergency purposes, adda kainaigan ti trabaho a kasapulan iti physical attendance, health ken emergency frontline service, courier service wenno delivery trucks, authorized humanitarian assistance, pannakaibiahe kadagiti bangkay, public utility servicing ken passerby.
Saan pay laeng a maipalubos dagiti turista a sumrek manipod ita nga aldaw March 24 agingga inton April 6, 2021.
Ti Mass gathering ket agingga laeng tallopulo a porsiento iti venue capacity ken rumbeng laeng a maipatungpal ti nainget a social distancing kasta pay iti panagaramat iti face mask ken face shield.
Kabayatanna, iti open air public areas ket rumbeng a limitaran ti Local Government Units iti bilang dagiti maipalubos a mapan ken agideploy iti agmonitor iti naing-inget nga implementasyon iti minimum public health standard.
