Mangirusat ti Philippine Ports Authority (PPA) iti sangapulo ket siam nga emergency response vehicles (ERV) iti agduduma a pantalan iti pagilian ita a lawas.
Segun ken ni PPA spokesperson Eunice Samonte, ti addang ket tapno mapapigsa ti kabaelan dagiti pantalan a mangsungbat kadagiti insidente kas iti uram ken dadduma pay nga emergency, ken tapno masalakniban dagiti empleado, pasahero, ken dadduma pay nga agar-aramat iti sangladan.
Karaman kadagiti alikamen ti tunggal ERV ti danom ken foam tanks, fire pump, first aid kits, communication equipment, rescue tools ken personal protective equipment.
Maited dagiti lugan kadagiti major ports a pakabilangan dagiti pantalan ti Batangas, Mindoro, Metro manila, Davao, Zamboanga, Iloilo, Bohol, Bataan ken Currimao.
