VIGAN CITY – Naisayangkat ti emergency council meeting ti National Disaster Risk Reduction and Management Council (NDRRMC) idi kalman inaig ti 2019 novel coronavirus – acute respiratory disease.
Ti pannaki-uman ti Bombo Radyo Vigan ken ni NDRRMC spokesman Mark Timbal, napagpapatangan iti nasao a taripnong dagiti nayon a suporta ken tulong para ti Inter-agency Task Force on Emerging Infectious Disease tapnu naep-epektibo iti pananglaban ken panangliklik nga agwaras pay iti nasao a sakit a naggapu idiay Wuhan City, China.
Karaman kadagiti napagpapatangan iti nasao a taripnong a tumulungan ti NDRRMC ket iti benneg ti contact tracing kadagiti nakapinnulapol dagiti tallo a nagpositibo ti nCoV ditoy pagilian kasta payen iti repatriation wennu panagawid dagiti Pilipino nga adda idiay China a kayat da iti dumalan ti 14-day quarantine period.
Malaksid iti dayta, nabilin pay dagiti amin a miyembro ti NDRRMC nga adda kapasidad ken kabaelan da a tumulong a masapul a tumulong da iti nasao nga inter-agency task force nangruna iti panangiwaragawag iti sitwasyon ti nasao a sakit ditoy pagilian ta saan nga agdanag iti publiko.
