VIGAN CITY – Pito a tattao iti nasalamaan gapu iti panangibiaheda kadagiti baboy a saan a dokumentado idiay Brgy. Tiagan, San Emilio.
Panaglabsing ti Provincial Ordinance Number 15-06 Series of 2015 iti sangwen da Wilfred Cabudol Castillo, agtawen ti limapulo ket lima, naasawaan nga agnaed idiay Brgy. Pantoc, San Isidro Abra a nagmaneho iti Isuzu elf truck kaduana ti pasaherona a da Ninia Alosa Pinera, agtawen iti tallopulo ket lima, naasawaan; Melchor Manganaan Favorito, agtawen iti duapulo ket walo; Reggie Castillo Pinera, agtawen iti tallopulo ket uppat, naasawaan; Arjay Bantigue Morong, agtawen iti duapulo ket lima, baro; Jun Jun Barbero Manuel, agtawen iti tallopulo ket maysa, baro; Lawrence Tobias Gregorio, agtawen iti sangapulo ket walo, naasawaan nga agpapada nga agnaed idiay Brgy. Mabilog, Villa Visciosa, Abra.
Maibasar iti pakaammo manipod San Emilio Police Station, nakaawatda iti report a mapapati nga adda ti nagibiahe ti taraken a nasalamaan dagiti Brgy. Officials iti Tiagan, San Emilio isu a nagrespondeda ket naamuanda a ti nasao a lugan ket nagibiahe iti pitopulo ket lima a baboy a saan a dokumentado.
Saanda a nakaipakita iti aniaman a pammaneknek a dimmalanda iti Animal Quarantine Checkpoint isu a nakikammayet dagiti kameng ti San Emilio PNP ken ni Municipal Agriculture Office respresentative Drigo Urmin.
Kabayatanna, dagiti nakemmeg a naglabsing ket properly documented ken insigida a nai-turn over iti agriculturist officer karamanen ti lugan a naaramat ken ti livestock products.
