VIGAN CITY – Pannakaikkat iti manibela ti rason no apay a nadungpar ti nagmaneho iti Isuzu Elf van ti maysa a magmagna iti igid ti kalsada idiay Barangay Nanguneg, Narvacan.
Nabigbig ti nagmaneho iti elf van a ni Alberto Pascua, agtawen iti uppat a pulo ket innem, company driver ken ti pasaherona a ni Raymund Fernandez, agtawen iti duapulo ket siam nga agpada a taga-San Fabian, Pangasinan.
Ti met magmagna iti igid ti kalsada ket ni Jaclyn Calixterio, agtawen iti uppat a pulo ket tallo, Barangay Health Worker iti Barangay San Antonio, Narvacan.
Agpapa-abagatan a direksyon ti elf van idin ta naikkat ti manibela ti lugan isu a saan a nakontrol ti drayber ket nadungparna ni Calixterio.
Nagsagaba ni Calixterio iti minor injuries isu a naipan iti Ilocos Sur District Hospital Narvacan para ti pannakatamingna idinto a ti drayber ken ti pasaherona ket saan a nadangran.
