VIGAN CITY – Nadundunor ti maysa nga electrician a nagmotorsiklo ta naidungpar iti maysa nga elf a nakaparking idiay Barangay Masadag, Sinait, Ilocos Sur.
Segun ti Sinait Municipal Police Station, ti nagmaneho ti Suzuki Raider 150 a motorsiklo ket ni Jenmar Ibus Agustin, agtawen iti uppat a pulo ket uppat, naasawaan, electrician nga agnaed idiay Barangay Cadanglaan, Sinait idinto a ti akin-kukua iti Isuzu Elf trailer carrier iti Rice Harvester ket ni Dominador Tabangin Sale, agtawen iti innem a pulo ket walo, balo nga agnaed idiay Barangay Nambaran, Sto. Domingo.
Agpapadaya a direksyon ti nakamotorsiklo idi saanna a napansin ti nakaparking nga elf isu a naidungpar a gappuanan ti pannaka-fracture iti akin-kannawan a luppona ken nakadunoran iti agduduma a paset iti bagina isu a naipan iti Ilocos Sur Provincial Hospital – Gabriela Silang para iti pannakatamingna.
Nakaru iti nadadael a paset ti motorsiklo isu a saan pay nga ammo nu mano ti gatad iti naapektaran a paset.
Naamoan nga awan iti warning device wenno street light iti nasao a nakapasamakan iti insidente ken naamoan a saan a nagaramat ti helmet ti nagmotorsiklo.
