Immapela ti Bureau of Fire Protection (BFP) iti households ken commercial establishments a siguradoen a namentenar iti electrical systems kagiddan ti panagrambak iti pagilian ti Fire Prevention Month ita a bulan.
Segun ken ni Senior Supt. Annalee Carbajal-Atienza a BRF spokesperson, ti saan a natalged wenno madi a pannakaaramat iti electrical facilities agtaltalinaed a kangrunaan a rason iti fire incidents.
Dagiti nasao nga insidente ket gapu ti saan a nasayaat a pannakaaramat ti electrical appliances, overloading iti power outlets ken ti napeggad nga octopus connections.
Dagiti dadduma a gappuanan ti uram ket ti open flames manipod gas lamps ken kandela, napanawan a lutlutwen ken slash-and-burn farming a mabalin a mangpagil-ayab iti flammable materials.
Nupay kasta ket bimmaba ti fire incidents iti tallopulo ket uppat a porsiento agingga 2,403 iti nagbaetan iti January 1 agingga February 28 nu yarig iti 3,847 nga insidente iti isu met la a panawen idi napalabas a tawen.
