VIGAN CITY – Pinasingkedan ni Atty. Edwin Concepcion, legal officer ni Mayor Luis “Chavit” Singson nga insanuden ti kampo ni dati a National Tobacco Administration (NTA) administrator Edgardo Zaragosa iti inpila na nga electoral protest inaig iti resulta iti napalabas a midterm elections idi Mayo.
Segun ken ni Concepcion, addan iti naawat da nga order manipud iti korte nga insanuden ti kampo ni Zaragosa ti inpila da a protesta isu nga awanen iti makalapped pay iti panagtakem ni Singson kas mayor ti Narvacan kenni Atty. Pablito Sanidad, Sr kas bise mayor ti ili.
Kinunana, kayat na laeng a sawen a ti pannakaisanud iti protesta ket ammon ti bangir a kampo a saan da nga agballigi ta awan iti naan-anay a pammaneknek da nga adda iti napasamak a panagswitikan iti botos iti napalabas nga eleksyon.
Maipalagip nga idi napalabas nga eleksyon, nakaala ti dati a gobernador iti pakabuklan a botos a nasurok a 16,000 idinto a ti kinalaban na ket nakaala laeng iti nasurok a 7,000.
