VIGAN CITY – Nagpalagip ni Civil Service Commission Region 1 Director Hedy Jose Lardizabal kadagiti civil servant a saanda a mainaig iti electioneering ken partisan political activity ita nga umadanin ti eleksyon.
Nakailanad iti salinong ti 1987 Constitution Joint Circular No. 001 series of 2016 a napetsaan iti March 29, 2016 a mangibagbaga a ti electioneering ken partisan political activity ket isu ti panangital-o wenno panangibaba iti maysa a kandidato wenno Partido.
Iti pannaki-uman ti Bombo Radyo Vigan ken ni Lardizabal, dagitoy ket pakairamanan ti panangbuangay iti asosasyon ken komite tapno ikampanya wenno padaksen ti maysa a kandidato wenno partido; panangbuangay iti political conferences a ti gagemna ket agala iti botos; panangaramid iti speech, announcement, komentaryo wenno interview a pabor wenno kontra iti panangibotos ti maysa a partido ken kandidato; panangipablaak ken panangiwaras iti campaign literature wenno materials a mangsupsuporta wenno mangkonkontra iti siasino man a kandidato wenno partido; ken ti direkta ken saan a direkta a panagala iti botos.
Linaon pay ti joint circular ti pannakaiparit ti panagisuot ti tshirts wenno pins, kallugong ken dadduma pay nga election paraphernalia a mangipakpakita iti nagan ti kandidato ken partido malaksid laeng no pinalubosan ida ti Commission on Elections; panagbalin a watcher para iti political party wenno candidate bayat ti eleksyon; kanayon a kaadda iti political rallies ken panangkadkadua kadagiti kandidato wenno partido iti aniaman a political activities; panangted iti personal, financial ken dadduma pay a monetary contribution, supply, equipment, ken material a para iti kandidato wenno political party; ken panagaramat iti government resources kas ti personnel pakairamanan ti job orders wenno contract of service hires, oras ken properties para iti political purposes.
Inlawlawag ti opisial a saan a maiparit para kadagiti civil servant ti agbotos ken mangiyebkas iti paniriganda mainaig iti political problems ken issues; panangibaga iti nagan ti kandidato wenno partido a supsuportaranda; ken pannakainaig iti patangan ti probable issues iti umadani nga eleksyon; kasta payen ti panag-like, comment, share, repost ken panang-follow iti account ti kandidato, malaksid no wagasda daytoy a makaala iti suporta para wenno kontraen ti kandidato ken partido bayat ti kampanya.
Dagiti mapaneknekan a guilty iti pannakainaig iti directly wenno indirectly partisan political activities ket ma-penalty iti makabulanken maysa nga aldaw agingga innem a bulan a pannakasuspenso para iti first offense idinto a pannakaikkat iti serbisyo ti second offense.
