VIGAN CITY – Inpatangken ni Atty. Vic Rodriguez, pannakangiwat ni dati a Sen. Bongbong Marcos iti pannaki-uman kenkuana ti Bombo Radyo Vigan a ti kangrunaan a kalikagum ni Vice President Leni Robredo a mawaswas iti election protest a sangsanguen na ket tapnu matakkaban iti napasamak a panagswitik na idi 2016 elections a nangabakan na kas bise presidente.
Addan iti memorandum tapnu makiddaw iti panagdengngeg iti nasao a protesta kasta payen iti pannakaituloy ti manual recount kadagiti probinsiya a mapapati a nangswitikan ni Robredo ken ni Marcos a kas pinasingkedan ni Rodriguez.
Malaksid iti dayta, adda pay iti inpila ti kampo ti dati a senador a memorandum tapnu maaprubaran iti kiddaw da a mawaswas iti resulta ti eleksyon idiay Lanao del Sur, Basilan ken Maguindanao gapu iti mapapati nga isyu iti terorismo ken pre-shading dagiti balota.
Innayon pay ti abogado ti dati a senador a ti nababa a rating ti bise presidente iti kampanya kontra iligal a droga ni Presidente Rodrigo Duterte ket mangipakita iti kinasalawasaw na isu nga ikagumaan da amin a pamuspusan tapnu mapaneknekan da iti napasamak nga anomalya idi 2016 elections.
Dayta ket kasaruno iti panangallukoy iti bise presidente iti opisina ti Presidential Electoral Tribunal (PET) nga ibasura da nga insigida iti election protest a naipila kontra kenkuana ta patien na a saan a nakaiparang iti bangir a kampo ti substantial recovery iti initial recount a nangabakan na ti nasurok a sangapulo ket lima ribo a botos.
