Naipaagas iti ospital ti maysa nga election coordinator a biktima iti mauling incident idiay Barangay Pudoc West, Tagudin, Ilocos Sur.
Ti biktima ket agtawen iti tallopulo ket uppat, agnaed iti nasao a lugar idinto dagiti suspek ket dua a lalaki a saanen a nabigbig.
Segun iti biktima, agtugtugaw nga agur-uray iti waiting shed ti lugar idin dimsaag dagiti suspek iti luganda ket sinaludsodda ti biktima no ania ti kaaddana idiay.
Sinungbatan met ti biktima ida nga isu ti coordinator dagiti dua a kandidato, ket dinanog metten dagiti suspek ti tyanna sa da pwinersa nga impan iti luganda.
Bayat ti kaaddana iti lugan, maysa kadagiti suspek ti nangdanog iti ulo ken rupa ti biktima iti namin-ano a daras ket sinaludsodda pay no isuda ti manggulgulo iti eleksyon iti nasao a lugar.
Nupay kasta, naitaray ti cellphone ti biktima ken ti nasurok kumurang P11,000 a kuarta ti biktima.
