VIGAN CITY – Insanud pay laeng dagiti political parties idiay United Kingdom dagiti election campaign kas pinasingkedan ni Bombo International Correspondent George Anthony Ingram a tubo ti Santa, Ilocos Sur.
Iti pannaki-uman ti Bombo Radyo Vigan ken ni Ingram, dayta ket kas panangipakita iti respeto ti ipupusay ni Prince Philip a mabigbigbig a great consort, nalaing a maki-angaw ken dakkel a pukaw iti pagilianda.
Imbuwis ni Prince Philip ti intero a biagna iti monarkiya ken napudno nga asawa ken ni Queen Elizabeth iti las-ud ti pitopulo a tawen a panagdennada.
Kabayatanna, saan a pagbalawan ni Ingram no maiwaragawag man kadagiti sumarsaruno nga aldaw no agikkat ni Queen Elizabeth iti pwestona ken saanen nga agparang iti publiko gapu ti pannakatay ti asawana.
Iti agdama, nakahalf-mast ti bandera ti nasao a pagilian ken nakamangisit amin dagiti opisial kas panangipasimudaag iti panagladingit ti intero a Britanya ti ipupusay ti prinsipe.
