Inpakaammo ti Department of Migrant Workers (DMW) a rinibu nga elderly overseas Filipino workers (OFWs) ti magunggonaan iti naan-anay a pannakaipatungpal ti Expanded Centenarian Act (RA 11982) inton tawen 2025.
Nagpirma ti DMW, National Commission of Senior Citizens (NCSC) ken dadduma pay nga ahensia ti gobierno iti joint memorandum circular a mangipatungpal kadagiti pagannurotan iti panangipaay iti benepisio kadagiti Filipino octogenarians, nonagenarians, ken centenarians kas sagudayen ti linteg.
Ti Expanded Centenarian Act ket mangipaay iti P10,000 a cash gift para kadagiti mangselebrar iti maika-80, maika-85, maika-90, ken maika-95 a kasangayda, idinto a ti P100,000 a cash gift para kadagiti agtawen iti 100 ket agtalinaed a kangrunaan ti linteg.
Inpangpangruna ti DMW dagiti senior OFWs iti 10-Point Agenda-da, para iti inkarina a mangaramid kadagiti specialized programs tapno mataming dagiti naisangsangayan a karitda.
Makitinnulong pay ti ahensia iti NCSC ken dadduma pay nga ahensia tapno masigurado ti naballigi a worldwide rollout ti Expanded Centenarians Act.
Makatulong ti Elderly Data Management System, maysa a digital tool, a mangpasayaat iti pannakaiwaras dagiti benepisio, mangsigurado a kualipikado dagiti senior citizens, nangruna dagiti agnanaed iti ballasiw-taaw nga umawat iti assistance efficiently ken transparently.
