VIGAN CITY – Naidalan ti Enhanced Community Quarantine dagiti nadumaduma a Sitio, Purok ken Zone ti sangapulo ket innem a barangay idiay ili ti Sta. Maria.
Iti pannaki-uman ti Bombo Radyo Vigan kenni Sta. Maria Mayor Brigido “Boy” Camarillo, napagpapatangan ti lokal IATF a maidalan iti nasao a community quarantine classification dagiti paset ti barangay tapno malapdan iti panagpangato pay iti kaso ti COVID19.
Epektibo ti ECQ kadagiti paset ti Brgy. Baliw Dayaw, Butir, Cabaroan, Danuman West, Dunglayan, Laslasong Norte, Laslasong Sur, Lubong, Maynganay Sur, Nagtupacan, Poblacion Norte, Poblacion Sur, Silag, Suso, Tangaoan, Tinaan inton June 9 agingga June 22.
Immandaren ni Camarillo kadagiti kameng ti PNP, BFP, MHO, Barangay Captain iti panangbantay kadagiti naapektaran a lugar ken dagiti mannalon, mangalap ket mapalubusan a rummuar tapno mapan agtalaon kasta met ti APOR, makasapol ti medikasyon ken dental assistance.
