VIGAN CITY – Maipatungpal iti Enhanced Community Quarantine (ECQ) iti ili ti Cabugao manipod June 3 agingga June 16 iti agdama a tawen.
Gapu iti dayta, saan a maipalubos a rumuar iti pagtaengan dagiti agtawen ti nababbaba ti sangapulo ket walo, nalablabes iti innem a pulo ket lima, masakit ken masikog ngem nu maibilang a frontliner ket mapalubosan a sumrek iti trabahona.
Maipatungpal iti curfew manipod iti alas otso iti rabii agingga alas singko iti bigat.
Mayunay-unay iti work-from home arrangement kadagiti mangmangged ken masapul a skeletal force kadagiti emplyado ti gobierno.
Saan a maipalubos nga agdine-in kadagiti restaurant nu diketdi take-out laeng iti maaramid tapno malilikan ti panaggi-innakar iti virus ket nainget pay a maipapatungpal iti liquor ban.
Kabayatanna, nu maipapan iti transportasyon ket kasapulan a maysa laeng iti mailugan ti tricycle idinto a kabbalay laeng iti maipalubos a kalubbon ti motorsiklo.
