Impaganetget ni Senate President Pro Tempore Panfilo Lacson nga ebidensia ken saan a tagari iti mangdusa kadagiti karaman iti mapapati nga anomalia kadagiti flood control projects.
Kinontra ni Lacson dagiti manggulgulo ken mangkukwestyon iti imbestigasyon ken kinunana a saan a makatulong dagiti tagari iti pannakaibalud kadagiti responsible.
Iti panagdenggeg iti komite ket naibutaktak iti nakaru ken sistematiko a panagabuso iti pondo dagiti umili a nakairamanan dagiti nangangato nga opisyal iti ehekutibo ken lehislatura karamanen dagiti pribado a kontratista.
Segun ken ni Lacson, adda dagiti kaso a naipila iti Sandiganbayan ken dadduma pay a korte idinto a ti dadduma ket dumaldalan iti imbestigasyon iti Office of the Ombudsman ken Department of Justice (DOJ), ket P21 billion kadagiti bank account ken sanikua iti na-freeze ken sumagmamanon a personalidad iti immannugot a makitinnulong iti gobierno.
Naibutaktak pay iti panagdenggeg dagiti conflict of interest iti Philippine Contractors Accreditation Board, ti pannakaibutaktak dagiti blacklisted a kompania iti salinong iti baro a nagan ken ti pannakaipaay ti dakkel a kontrata kadagiti kompania nga agkurang iti kapitalna.
