Pakadanagan ni Senador Risa Hontiveros a mabalin nga agpusta kadagiti online gambling website iti dakkel a gatad babaen ti e-wallet wenno online payment platforms.
Pinasingkedan ni Hontiveros a babaen ti e-wallet app ket mabalin nga agpusta iti uray P500,000 iti mismo nga online gambling sites.
Segun ken ni Hontiveros, pudno a naikkat kadagiti e-wallet kas iti GCash ken PayMaya ti link dagiti online gambling websites ngem nadismaya ta maar-aramat latta iti panag-deposit ken panag-withdraw iti uneg dagiti platform iti online gambling.
Insaludsud ni Hontiveros kadagiti kameng ti e-wallet platforms nu kayatda nga i-delink wenno iparit payen ti panag-cash-in ken cash-out iti mismo nga online gambling apps.
Segun kadagiti mangidaulo iti nasao nga online payment platforms, nakasaganada a sumurot nga insigida nu adda regulasyon wenno bilin nga iruar iti gobierno wenno Bangko Sentral ng Pilipinas (BSP).
