Mangrugi ita nga aldaw ket ipatungpalen ti Land Transportation Office (LTO) ti pannakaiparit dagiti e-trike kadagiti kangrunaan a kalsada idiay Metro Manila.
Karaman kadagiti madi a madalanan iti e-trike ti EDSA, C-5 Road, Roxas Boulevard ken ti ruta ti Quirino Avenue agingga Magallanes-South Luzon Expressway (SLEX), kasaruno ti ipatpatungpal a pagannurotan ti MMDA.
Segun ken ni LTO Chief Assistant Secretary Markus Lacanilao, ti kangrunaan a rason ti nasao nga addang ket iti kinatalged iti kalsada.
Dagiti major highway ket nadisenyo para kadagiti napaspas ken dadakkel a lugan isu a delikado iti panagsabay iti nabuntog ken nalag-an a lugan a kas ti e-trike.
No pay kasta, impaganetget ti LTO a saan a gagem nga iparit ti e-trike ta nakasaganada a makitinnulong kadagiti lokal a gobierno tapno mangituding iti natalged ken mayannatup a ruta kadagiti e-trike.
Imballaag ti ahensya kadagiti aglabsing a mamuelta ken mabalin a ma-impound ti e-trike kasaruno ti Republic Act 4136 ken Joint Administrative Order No. 2014-01.
Mangdeploy ti LTO kadagiti enforcer kadagiti kritikal a lugar tapno masigurado a masursurot iti pagannurotan.
