VIGAN CITY- Saan a mailadawan a ragsak iti marikrikna ni Marissa Alcantara, provincial director iti TESDA- Ilocos Sur, agsipud ta nagiddan a nakapasa iti board exams dagti dwa nga annak na a da Atty. Chelsea Marife Alcantara ken Atty. Eric Stephen Alcantara.
Segun kenni Dir. Alcantara, arig na agtagtagainep ken nakabatay iti ulep iti panangrikna na agsipud ta saan laeng a maysa no di ket duwa kadagiti annak na iti nakapasa.
Ni Atty. Chelsea ket maysa a Certified Public Accountant (CPA) idinto a ni Atty. Eric Stephen ket registered nurse ket agpada da a nagturos iti kinaabogasya idiay Don Mariano Marcos State University(DMMSU), San Fernando City, La Union.
Nagyaman ni Dir. Alcantara ta uray no namindwa a saan a nakapasa iti anak na a lalaki ken naminsan a bimmagsak iti babai ket saan da a simmuko no di ket intultuloy da iti nagreview agingga a nakapasa ket nagbalin da nga abogado.
Napalaos met iti ragsak ni PS/Insp. Frederico Artates , hepe iti Caoayan Municipal Police Station(MPS) agsipud ta nakapasa ti potot na a ni Atty. Derick Jackson Artates.
Segun iti COP, nagbunga dagiti rigat ken sakripisyo iti potot na gapu ta natungpal nan iti arapaap na nga agbalin nga abogado.
