Nangipila ni Senador Ronald Bato dela Rosa iti gakat a mangisubli iti death penalty iti pagilian babaen iti lethal injection para kadagiti opisial ti gobierno a mapaneknekan a mairaman iti plunder.
Nadakamat ni Dela Rosa dagiti anomalya kadagiti flood control project kas pangiyarigan iti nakaro nga anomalya a nasken a mapatawan iti kadagsenan a pannusa.
Segun iti senador, no ti kinagamrud dagiti dadduma nga opisial ti rason ti panagrigat dagiti umili, nasken laeng a biag ti sukat ti krimen nga inaramidda.
Gagem ti gakat a biagen ti Republic Act No 8177 a napukaw idi 2006 kalpasan a naipasa ti linteg a mangikkat iti death penalty iti pagilian.
Immunan nga insingasing ti senador ti pannakaisubli ti dusa a patay para kadagiti dakkel a drug trafficker.
