Umabot iti 500 square meter iti naapektaran iti uram a napasamak iti dumpsite idiay Sitio Nalasin, Barangay Camanggaan, Vigan City, Ilocos Sur.
Iti pannaki-uman ti Bombo Radyo Vigan ken ni Senior Fire Officer 3 Darrios Orpilla manipod Bureau of Fire Protection – Vigan City, nagtaud iti uram iti 350 meters, amianan a laud manipod iti dump site proper a ti kangrunaan nga adda didiay ket dagiti nagango a ruot ken bulbulong isu a napaspas iti panagkayamkam iti uram iti kaasidegna.
Nu man pay namin-ano a daras a nadepdep iti uram manipod nangrugi idi April 3, 2025 iti oras iti alas onse kuarenta iti bigat ket agsubli subli ti apoy gapu iti bara a sumngaw manipod iti baba isu nga agtultuloy latta iti panagmonitorda.
Inlawlawag ni Orpilla a gapu iti nagtitipon a basura ket adda latta panagilayab dagiti dadduma a maapektaran nga isu iti resrespondean dagiti bumbero.
Nupay timmulong dagiti kabangibang a Bureau of Fire, dadduma nga ahensya iti local a gobierno ken private fire brigade para iti panangdepdep iti apoy, kasta payen nga addan ti naipan a bulldozer ken dump truck nga aggabor iti daga kadagiti apektado a paset ket kasapulanda pay iti nayon a tulong tapno maliklikanen a kumaru pay.
VIDEO – SENIOR FIRE OFFICER 3 DARRIOS ORPILLA
Kabayatanna, kiddawna kadagiti umili a makolkolektaan iti basura nga ilasinda a nasayaat dagiti flammable a basurada tapno saan a mangitunda iti uram nangruna ita a nabara iti panniempo; kasta payen a kiddawna iti panagawat kadagiti apektado a lugar nangruna iti ili ti Caoayan ken Santa gapu iti agtultuloy nga asok nga agturong iti lugarda ta ar-aramidenda amin nga addang tapno saanen a kumaru pay .
VIDEO – SENIOR FIRE OFFICER 3 DARRIOS ORPILLA
