Vigan City – Sursuruten laeng iti inyetnag a pagannurutan ti national, provincial ken municipal government iti ili ti Bantay inaig iti pannakaipatungpal iti curfew hour isu a saan a mapalubusan ti siasinoman a dumalyasat iti nasao nga ili agingga saan a nalpas ti oras.
Segun kenni PMaj. Nolly Salleng a hepe ti Bantay Municipal Police Station, nainget iti panangipatungpalda iti curfew hour iti nasao nga ili a banag a saan a mapalubusan dagiti agbiahe iti nasapsapa ngem iti naiyetnag a curfew hour iti oras iti alas otso iti rabii agingga alas singko iti bigat.
No pay kasta ket kitkitaendan no ania iti mabalinda nga ikonsiderar a palubusan ngem inyunay-unayna iti panagsurot ti naimplementar.
Kabayatanna, dagiti aglabsing iti curfew hour ket no ti first offense ket agbayad iti lima gasut a pisos, second offense ket sangaribo a pisos ken ti third offense ket sangaribo ket lima gasut a pisos.
