VIGAN CITY – Balligi ti Dugong Bombo New Normal Blood Letting Activity a naisayangkat iti Ilocos Sur Community College Gym iti ili ti Bantay ta umabot iti innem a pulo ket siam iti successful blood donors.
Ti nasao a bloodletting activity ket babaen iti panagtitinnulong iti Provincial Government of Ilocos Sur, Provincial Health Office, Alpha Kappa RHO fraternity ken Bombo Radyo Vigan.
Kalaksidan kadagiti kameng ti fraternity ket adda pay dagiti nakipagpaset a grupo dagiti riders.
Napalaus iti ragsak iti sibubukel nga Alpha Kappa Rho kangrunaan ti mangidadaulo iti Ilocos Sur-Chapter a ni Gov. Kevin Alagao ta adu ti kamiembrona ti nakipaset ta nasursurok pay ngem iti targetda a limapulo iti nagidonar.
Yamanenna pay iti sakripisyo dagiti kakaduana ta makita iti napalaus a suportada ta nakapartisipar iti amin a chapter iti kada ili iti Ilocos Sur.
Kabayatanna, gapu iti innem a pulo ket siam a nayon ket umaboten iti 1,159 iti successful blood donors manipod idi Enero iti agdama a tawen.
