VIGAN CITY – Duapulo ti nakapasa iti Licensure Examination for Agriculturist a benepisyaryo iti libre a LEA Review nga indiaya ti Santa Local Government Unit.
Manipud iti nasao a bilang ket tallo ti tubo iti ili a Santa idinto a ti sangapulo ket pito ket manipud iti nadumaduma nga ili.
Segun ken ni Mayor Jesus “Popoy” Bueno, saanda nga impaidam ti nasao a banag ta inlukatda uray kadagiti sabali nga ili.
Dagiti immuna a pimmasa ket nalakadan a simrek iti trabahoda ta adda dagiti agtrabtrabahon iti gobierno ken kadagiti pribado a kompania.
Ti panangidiaya ti lokal a gobierno ti Santa iti libre a LEA Review ket gapu iti gagemda a makatulong kadagiti nagannak ken annak tapno saandan a magastosan a mapan iti ad-adayo a lugar a mapan ag-review.
Malaksid iti libre a review a naidiaya, adda pay ti lima a ribo a pisos nga allowance a naipaay kadagiti benepisyaryo a napan nagexam.
Nupay kasta, impanamnama ti mayor a dagiti nakapasa a taga-Santa ket siguradon ti trabahoda ta adda dua a bakante idinto a ti maysa ket mairekomendar iti provincial government.
