VIGAN CITY – Nagbalinen a dua ribo nga estudiante nga annak ti mannalon ken mangngalap manipud ti dati laeng a sangaribo a target ti nabenepisyaran manipud iti sangapulo a milion a pisos nga impaay ni Senador Imee Marcos para kadagiti estudiante a naapektaran iti bagyo Egay.
Dayta ket kalpasan nga adu dagiti napan nagreklamo iti Farmers Livelihood Development Center nga awan ti nagan dagiti dadduma nga estudiante.
Inlawlawag ni Governor Jerry Singson a sangaribo nga estudiante ti target a maipaayan koma iti sangapulo a ribo a pisos iti tunggal maysa ngem gapu ti kinaadu dagiti nagreklamo nga awan dagiti naganda a nailista ket kiniddawda iti senador a pagbalinen a dua ribo nga estudiante dagiti benepisyaryo a dagitoy ket maipaayan laengen iti lima ribo a pisos iti tunggal maysa.
Nupay kasta, naipaayan met laeng amin dagiti estudiante a nagreklamo ta inabunaranen ti provincial government ti surok iti bilang manipud ti dua ribo laeng koma a target ti nasao a tulong pinansial.
