VIGAN CITY – Dua pulo a tattao idiay Lintic, Banayoyo iti nabakunaan idi Martes kas kinumpirmaran ni Banayoyo municipal health officer Dr. Cherry Mayegayeg.
Dayta ket mainaig pay laeng iti pannakatay ti maysa a lalaki itay kallabes ta nakagat ti aso nga adda rabies na idi Marso ngem saan na nga inkaskaso, saan a nagpapacheck up ken saan a nagpapabakuna.
Segun ken ni Dr. Mayegayeg, dagiti direkta a nakapinpinnulapol ti biktima kas kadagiti kameng iti pamilya na ket maikkan ti tallo a dose iti bakuna idinto a dagiti nai-expose iti karne ti aso kas kadagiti nagpulutan iti aso a mapapati nga adda rabies na ket maikkan ti dua a dose iti bakuna.
Inbalakad met ti doktora kadagiti tattao a nu makagat da iti aso ket insigida nga agpacheck-up da iti doktor tapnu saanen a maulit iti nasao a pasamak.
