VIGAN CITY – Duan iti natay gapu ti dengue ditoy probinsiya, maysa idiay ili ti Sta. Cruz ken idiay ili ti Del Pilar ngem segun ken ni Engr. John Foz ti Department of Health- Ilocos Sur, saan pay laeng nga isu iti naka-al-alarma ta dua pay laeng iti bilang dagiti natay gapu ti dengue ditoy probinsiya itatta a tawen manipud Enero agingga Hulyo nga adayo a nababbaba ngem iti walo a bilang dagiti natay idi napalabas a tawen.
Segun ken ni Foz, ti nababa a bilang dagiti natay gapu ti dengue ditoy probinsiya ket mangipakita a napintas iti panangtaming ken panangmanehar dagiti pribado ken publiko nga ospital kadagiti kaso ti dengue ta napapintas dagiti ospital, nangruna dagiti district hospitals.
Inulit ti opisyal iti palagip a kadagitoy a panawen iti bagyo ken nepnep, nu agsakit iti ulo ken aggurigor dagiti ubbing, masapul nga insigida nga ipan iti ospital ta dagita iti nasapa a sintomas ti sakit a dengue.
Inyunay-unay na a saan a mabalin ti self- medication kadagiti dengue patients tapnu saan nga isu iti pakaisagmakan da.
Innayon pay iti opisyal a nu adda iti dua wennu tallo a pasyente a ma-admit kadagiti ospital a posible a gapu ti dengue, masapul nga ipakaammo iti ospital nga insigida kadagiti maseknan a mayor tapnu maaksyunan nga insigida ken maliklikan nga umadu ti bilang dagiti mabiktima ti nasao a sakit.
