VIGAN CITY – Dua nga anggulo iti nadakamat ti pamilya ni Jerick Venosa inaig ti pannatayna idiay Sitio Baoay, Brgy. Paing, Bantay.
Iti pannaki-uman ti Bombo Radyo Vigan kenni Santos Venoza Jr, ama ni Jerick, adda iti nakarelasyon ti putotna nga adda asawana ngem bayat iti pannakipatpatangda kadakuada nadakamatda nga adda iti nagpatangan ti putotna inaig iti relasyonda.
Binagbagaanda ni Jerick ket nagtultuloy ti relasyonda nga awan iti nakitada a parikot bayat iti panaginnayatda.
Sakbay a pimmusay ni Jerick nadakamat ti inana a ni Olivia Venoza nga adda iti sinangailida iti dua nga aldaw a nangsimpa ti motorsiklo ti biktima a padana a mangmangged ti nasao a construction supply.
Adda iti saan a panagkinnawatan ni Jerick ken iti lalaki a nangsimpa ti motorsiklona ta pinabasolna nga innala ni Jerick ti cellphone na iso a dinanogna.
Naisawang ti nasao a lalaki a no dina ited ti cellphone ket matay ti biktima.
Innayon ni Olivia a ti cellphone a mapukpukaw ket nabatida idiay tienda ta napanda nagpaload da Jerick ken ti kadduana.
Naimbitaran ni Jerick ti PNP agingga intulodda ken adda iti pinapirmaanda a pammaneknek a nakaawid nga awan iti aniaman a dunorna.
Sakbay a nasarakan a natay napan nagtrabaho ti biktima agingga nasarakan laengen nga awan biagna ti kabigatanna ta saan a nagawid iti pagtaenganda.
Impakammu pay iti pamilya ti biktima nga adda iti napalabas a nakainaigan ni Jerick iti illigal a droga.
