VIGAN CITY – Dua ti natay iti agsina nga aksidente iti ili ti San Juan.
Immuna a napasamak iti aksidente iti provincial road idiay Barangay Cabanglutan, San Juan a nakatayan ni Muhammad Rakim, agtawen ti duapulo ket uppat, drayber ti nangisit a Honda wave a motorsiklo ta naitapuakda iti creek ti kinalubbonna a ni Christian Kim Vaquilar, agtawen duapulo a taga Brgy Bannuar, San Juan kalpasan a naawanan ti kontrol ti manibela ti driver.
Head injury ti sinagaba ti nagmaneho ti motorsiklo, idinto a ti backrider ket nagsagaba ti leg injury iti makinkannigid a sakana isu a naipan iti Pira Hospital, Cabugao.
Dead on arrival met ti maysa pay a nagmaneho ti motorsiklo ta natukbobna iti maysa nga elf iti national highway idiay Brgy. Bacsil, San Juan.
Ti nagmaneho iti motoposh a motorsiklo ket ni Bryan Karl Ujano, agtawen ti duapulo ket lima, baro, laborer nga agnaed idiay Panay Norte, Magsingal idinto a ti nagmaneho ti elf truck ket ni Philip Rapanut, agtawen tallopulo ket siam a taga-Brgy Sinabaan, Sta. Catalina.
Segun iti San Juan Municipal Police Station, agpada dagiti lugan a sumangsang-at iti nasao a lugar nga agturong iti amianan a direksyon idi natukbob ti motorsiklo iti likudan a paset ti isuzu Elf
Naipan iti Pira Hospital Cabugao ni Ujano ngem saanen a nakasalat idinto a saan met a naan-ano ti driver ti Isuzu Elf.
